ZAPATAK
Ikusleak eskenatokiaren bueltak jarriak daude, espazio borobil bat
eginaz. Eskenatokian zapatak daude barreiatuak nonahi, era guztietako
oinetakoak, norbaitek airetik bota izan balitu eta erori diren moduan utziak.
Sirena hotsak entzuten dira eta leherketa batzuk. Dena ilunpetan geratzen da. Hegazkin
militarren zarata entzuten hasten da. Bonbardaketa bat da. Burrunbak argi
leherketekin nahasten dira. Alde guztietatik datoz. Ezin da sumatu arriskuaren
norabidea, lau haizetatik dator. Bonbardaketa gelditzen denean, eskenatokia argituko
da, baina zatika, argia ez dator dena batera. Emakume bat ageri da erdian,
belauniko, eskuetan haur oinetako pare bat duela, odolduak. Emakumea gaztea da.
Daramazkien arropak mendebaldeko itxura dute, baina lepoko bat darama zintzilik;
beharbada orain dela gutxi arte burua estaltzen zion. Oinetakoak laztantzen ditu,
panpina bat baliran.
Lasai oraingoz amaitu da.
Txoritzarrak ez dira berriro itzuliko. Baina zer axola zuri. Zure oinek ez dute
lur madarikatu hau berriro ibiliko. Zer axola zuri orain txorien hegalaldiak,
ilunak edo koloretsuak izan. Orain zure oinak libre dira nahi duten lurra
urratzeko. Lur beltzak, lur idorrak, bustiak, koloretakoak, lur porlaneztatuak.
Orain zure oinak libre dira pausuak nahi duten norabidean jartzeko. Oinetakorik
gabe askeago izango zara. Oinetakoak asmatu omen zituzten pertsona lurretik aldentzeko,
bere arima lurrarekin bat egin ez zezan. Eta, lurra ematerakoan ere zapatak
gurekin eraman ohi ditugu. Batzutan ordea, galdu egiten ditugu, eta orduan
sentituko dugu behearen hotza. Sentituko dugu hautsa behatz artean sartzen,
harri txintxarrien kilika, eta egurraren beroa. Baina arrotz sentituko dugu
ibiltzen dugun lur hori, oinetakoen babeslekutik igorriak. Zapatak galtzea gure
baitako galera da. Zapatak uzten ditugunean etxe atarian, biluzik sartzen gara,
garena erakutsiz. Eta orain zure oinetako txikiak baino ez dizkidazu utzi. Zure
etxe ataria banintz legez.
(Isildu
egiten da une batez, memorian etxea irudikatzen ariko balitz bezala. Agian etxe
eder bat zeukan, pikondoa atarian, uda beroan gerizpe lasaia eskaintzen zuena.
Eta eguerdi partean otorduaren usainak leihotik kanpora zabaltzen ziren. Une batez usain horrekin gozatzen ari dela
dirudi, baina une txiki batez, ia susmagaitza. Bat batean itzuli egiten da,
zerbaiten bila ariko balitz espazioan)
(Desesperatuta) Nork esan zuen eskolan babestuak egongo zirela?
Nork? Zertarako eskolara bidali hitza lapurtu dietenak? Zer ikasiko du
inexistentziara kondenatuta dagoena? (isiltzen
da. Besoetan dituen oinetakoak laztantzen ditu. Lasaiago) Txikitan eskola
txiki bat egin ziguten. Hasieran ez genuen. Ez ginen hangoak. Inor ez zen
hangoa. Leku hura ere ez zen hangoa. Gu heldu aurretik ezer ez zegoen. Lur
eremu idor eta zabala baizik. Eta asko ginen, gehiegi. Haurrak ugari. Haur asko
eta asko ginen. Eta ez genuen eskolarik. Etxea ez genuen bezalaxe. Gentozen
lekuan etxe bat bageneukan. Txikia. Umila. Baina ateak giltza handi batez
zabaltzen eta ixten zen. Etxe horren giltza baino ez zitzaigun geratu,
itzultzearen itxaropena. Giltza handi
eta astuna, patrikan eraman ezina, gerritik zintzilik eraman behar zen.
Eta heldu ginenean hura geneukan altxor bakarra. Aitak, egunero koipeztatzen
zuen, herdoilak ez hartzeko, esaten baitzuen, giltza herdoiltzen bazen, gure
itxaropena ere herdoilduko zela, eta etxea ahaztuta gure arima ere ahaztuko
genuela, ibilitako urratsetan galdurik.
Eta gero eskola egin
ziguten haurrei. Eskola etorkizuna baitzen. Guk, iragana baino ez genuenok,
etorkizuna amesten genuen. Eta etorkizun horretan pasealekuak zabaltzen ziren,
eta bulebarrak, eta eskutik helduta paseatzen ginen, udaberriko arratsalde
epeletan, unibertsitatetik bueltan. Egun batean koloretako arkatzak eta
koadernoak ekarri zizkiguten, auskalo nondik lortuak, eta goiza eman genuen
marrazkiak egiten. Irakasleak banan bana partitu zituen guztion artean. Esan
zigun koadernoak irudimenaren erakusleihoak direla. Koaderno batean amets
guztiak sar daitezkeela eta behin bertan itsatsiz gero, paperak erreta ere,
amets horiek ez direla inoiz desagertzen. Ametsak airean omen daude eta esna gaudenean,
arnasten ditugu, gero, lotarakoan, kanporantz irteten direlarik. Amets batzuek
ez dakite irtenbidea bilatzen, eta gaiztotzen omen dira orduan, amesgaiztoak
bihurtzen. Libre ibiltzen ikasten dutenek, ordea, libre senti arazten gaituzte.
Horregatik ez zuen maite aire kutsatua, irakasleak. “Aire kutsatuak barruak
belzten dizkigu eta ametsak ilundu”- zioen koadernoak partitzen zituen
bitartean. Eta paperak koloreztatzen eman genuen goiza. Nik, ederki gogoan dut,
itsaso zabal urdina margotu nuen, eta bertan belauntzi bat, belauntziaren
barnean neska bat eta mastarik handienean txori bat. Eta belauntziaren alboan,
bere bidea jarraituz, izurde bat. Nik inoiz ikusi gabeak nituen, ez belauntzia
ezta izurdea ere, baina argazkiak zituen aldizkari batean bai. Txoria, txikitan
etxean kaiolatuta genuena margotu nuen. Eta irakasleak galdetu zidan ea nora
zihoan belauntziak, zein portura. Nik erantzun nion nabigatu egiten zuela,
besterik gabe. Gainera ez nuela porturik ezagutzen, nik leku hartako kaleak
baino ez nituela ezagutzen, esan nion. Eta denbora luzez egon zen itsatsirik
etxeko pareta batean marrazki hori. Etxea suntsitu zuten arte.
(Isilunea. Aurpegian oroimen
batetik besterako aldaketa ikusten zaio. Oroimen gozo eta lasai batetik,
urduritasunera igarotzen da)
Goiz batez heldu ziren.
Aurretik soldaduak, eta tankeak, eta
gertutik suntsitze makinak. Metalezko munstroak. Amets gaiztoenetan ere
agertzen ez direnak. Laster batean harri pila baino ez zen geratzen, eta gure
amaren oihuak eta negarrak ditut gogoan. Semea galdu berria zuen eta orain
etxea. Berriro. Aitak eskuetan zuen giltza zaharra, estuturik. Eta gu kalean
eserita, ez malkorik ez zotinik. Ohitura hartua genuen halakorik ikusten. Nire
marrazkia gogoratu nuen. Itsasontzia harri hondakinen artean nabigatzen
imajinatu nuen, ekaitz hartatik ihes egin nahian. Osaba izeben etxean egin
ziguten lekua. Gau horretan itsas zabal batekin amets egin nuen. Eta belauntzi
batekin. Eta belauntziaren bidaia jarraituz izurde bat zegoen. Eta mastarik
luzeenaren puntan, txoria, eta ni, lemazain. Horixe da gogoratzen dudan azken
ametsa.
(Argiak moteltzen dira eta emakumea kuzkurtzen da lurrean lo hartzearen
itxuraz. Belauntzi batek gurutzatzen du eskenatokia. Bere gorputzean nabigatzen
du. Izurde txiki bat gorputzean jauzika ari da. Haizearen eta itsasoaren
doinuak baino ez dira entzuten. Eta emakumearen barnetik ilargi handi bat
agertzen da, motel, lasai, denborarik existituko ez balitz bezala. Bat batean
emakumea mugimendu urdurietan hasten da, ametsetan. Zerbait gertatzen ari zaio.
Itsasoaren irudi onirikoa berehala desagertzen da, bat-batean ia. Murmuratzen
du zerbait hortz artean, baina berehala oihuka hasten da. Derrepentean esnatzen
da, beldurrak jota. Argia )
Irten hortik! Irten
hortik! Kontuz! Badatoz! Badatoz! Irten Hortik! (Altxatzen da eta zerura begiratzen du ikaraturik. Keinuak egiten ditu,
norbait deitzen ariko balitz bezala. Keinuak urduriak dira, ikaratiak. Esango
genuke oraindik ametsetan dagoela, sonanbula agian. Orduan, tupustean, esnatzen
da. Isilik geratzen da inguruari begira. Lur gaina oinetakoz beteta ikusten.
Begiekin zerbait bilatzen ari da. Eskuetan, magalean babesturik, zituen
oinetako txikiak ikusten ditu lurrean, etzanda zegoen lekuan. Makurtzen da.
Hartzen ditu)
Udaberriekin datozen txoriek berri onak ekartzen
omen dituzte. Bisitatu dituzten lurraldeen berri dakarzkigute eta iragartzen
arbolak loratzen hasiko direla. Txorien kantuek alaitzen dute luzatzen hasi den
eguna eta haurren jolasek kaleak argitzen dituzte. Itxaropenaren iragarleak
omen. Ez dut ikusten, ordea, txoririk heltzen, ez ditut bere kantuak entzuten,
ezta haien hegaldi biziekin zeruko
urdina bereizten. Ez ditut haurrak kaleak jolas alaietan susmatzen, ezta euren
kantuak entzuten. Eskolarako bidean ez dabil inor, ez baita eskolarik agertzen.
Hemen hegan dabiltzan hegazti bakarrak burdinazkoak dituzte hegalak, eta euren
kantuak txilio zorrotz amaigabeak ditu. Heltzen direnean negurik gorriena
iragartzen dute, suzko elur zuria eta lore sorta leherkariak. Haurrek
eskolarako bidean noranahi ihes egiten dute lasterka, kanturik gabe, jolasik
gabe. Eta eskola desagertu da. Hemen ikastea debekatuta dago. Ihes egitea
debekatuta dago. Jatea debekatuta dago. Hemen dena dago debekatuta, hiltzea
bera ere ukatzen da. Hemen ez gara ez
inor ez ezer, lehertzen diren etxeetako adreiluak baizik. Inexistentziara
kondenatuak garen itzalak baino ez gara. Hemen gaude, baina inork ez gaitu
ikusten. Oihukatzen dugu, baina gorreriak jota dago mundua. Inexistentziara
kondenatua dagoenak badaki, oroimena dela bere euskarri bakarra, bizitzari
lotuko dion zilborreste bakarra.
(Oinetakoak laztanduz. Errealitatera itzultzen da)Eta zuk zein
etxetako hondakin bihurtu zaituzte? Nora joan da zure irribarrea? Non dira zure
urrats azkar eta txikiak? Hanka txiki horiek ez zintuzten urrutira heltzen
uzten. Zergatik sortu ote zintudan? Zertarako bizitza eman jaio aurretik
heriotzara kondenatuta bazeunden? Sehaska kantuetarako astirik ere ez genuen izan.
Nola lokartu arazi gaueko burrunbetan kantuetarako doinuak galtzen direnean.
Eta nahiko nuke kantu eder eta lasaia abestu, baina nire arimak, halakorik
balego, gormutua da.
Eta nori errua bota? Ba
ote du norbaitek errurik? Ba ote dugu madarikazio eternala jaurtitzerik
hiltzaileei? Zer egin? Nola negar egin malkorik ez dagoenean?
(Kantari hasten da. Magaleko haurrari kantatuko balio bezala)
Les nenes maques al dematí
S’alcen i reguen
El seu jardí
Jo També rego el meu jardí
Faves i pèsols
Faves i pèsols i julivert
Julivert meu com t’has quedat?
Sense cap fulla
I el cap pelat.
(Barre egiten du. Haurrari hizketan)
Polita ezta? Zu bezain bat
ezin. Ez, neronek ere ez dut ulertzen zer dioen. Txikitan ikasi nuen, urrutitik
etorritako gazte batzuek erakutsita. Gu laguntzera etorri ziren. Denbora gutxi
ordea, gero alde egin baitzuten. Edo bota egin zituzten, ez dut gogoan. Baina
asko jolasten ziren gurekin. Eta gu ere adarra jotzen genien. (barreak), ez baitzuten tutik ulertzen
esaten genuena.
(Haurraren hatzak hartuko balitu bezala) Honek txotxak bildu, honek
sua piztu…
(Urrutian hegazkin hotsak entzuten dira. Razzia berri bat. Emakumeak
zerura begiratzen du, eta instintiboki oinetakoak magalean babesten ditu)
Lasai, diote bonba bat
erori den lekuan ez dela beste bat erortzen. Diote, baina zer dakite estatistika
egileek? Han ote ziren? Euren burua jarri ote zuten bonbaren azpian airetik
zetorrela? Ez ote ziren mugitu ere egin? Zer ote dakite beraiek? Beharbada
beharrezkoa izango dute informazio hori ahalik eta lehergailu zehatzenak
asmatzeko. Pertsonaren inteligentzia maltzurra da. Bizitza eternoarekin egiten
du amets, bizia nola akabatu asmatzen duen bitartean.
Guk txakur bat geneukan
etxean. Txakurrek ez dute ezer egiten, egon baizik. Jaiotzen dira, etxean
egoten dira eta halako batean hil egiten dira. Eta bere ordez, segur aski beste
bat sartuko dugu etxean. Gure txakurra txikia zen. Arrazarik gabekoa. Txakurrik
eta haurrik gabeko etxea, etxe tristea da, zioen gure amak. Eta arrazoia izango
zuen, izan ere etxean txakurrik gabe geratu ginenean tristezi ospel bat sartu
baitzen. Txakurrek guk entzun ezin ditugunak entzuten omen dituzte, eta
animalia guztiek bezala, heriotza usaintzen omen dute. Gure txakurra egun batez
desagertu egin zen. Eme baten atzetik joango ote zelakoan ginen gu. Ez genuen
imajinatu hegazti doilorretik ihesean desagertu zela.
(Zapatak laztantzen ditu
txakurra esku artean balu bezala)
Hori izan zen emakumeen
etxea suntsitu zutenekoan. (Pentsakor
gelditzen da. Irribarre bat hazten hasi zaio oroimena etorri ahala)
Emakumeen etxea deitzen genion bakarrik emakumeak eta neskak, eta neskatxak
biltzen zirelako. Gizonek debekatuta zuten sartzea, umetxoak izan ezik. Ederrak
izaten ziren bilkura haiek. Emakumeek era guztietako istorioak kontatzen genizkion
elkarri; garai bateko bizimodua nolakoa zen, pasadizo irrigarriak, istorioak
eta, batez ere, ipuinak. Maite nuen ipuinak kontatzen hasten zirenean. Bazen
beti emakume bat abila horretan, zaharra zen eta hitzak bere ahotik loreak
bezala sortzen ziren. Gehienetan emakumeak ziren ipuin horietako protagonistak.
Tarteka haurrentzat kontatzen zituen ipuinak, baina gero emakume helduak eta
gazteak bakarrik uler zitzaketenak. Orduan, nik ez nituen ulertzen batzutan
egiten zituzten barre lotsati eta isilak, edo sekulako barre algarak. Handitu
nintzenean bai (barre egiten du),orduan
bai, ulertu nituen barre haiek. Askotan gizonak izaten ziren barre haien
arrazoia. Igarkizunak ere izaten ziren. Haurrei asko gustatzen zitzaizkigun,
eta baita helduei ere,. Batzutan ez zituzten soluzioak ematen hurrengo bilerara
arte eta hantxe ibiltzen ginen asmatu nahian galderak eta galderak egiten. Bada
oraindik bat asmatu ezinik nabilena. Normalean entzun baino egiten ez zuen
emakume isil batek bota zuen, denen harridurarako; ea gogoratzen dudan:
(Ikusleei kontatzen die,
bilkura haietako partaideak izango balira bezala)
Ipuin igarkizuna
Baziren behin hiru emakume aztikeri baten eraginez lore
bihurtuta eman behar zutela bizitza zelai batean. Horietako bat, ordea, gauez
emakume itxura hartzen zuen eta senarrarekin eman zezakeen eguna hasi bitarteko
orduak. Behin, eguna hasi aurretik eta etxetik irten behar zuenean berriro lore
bihurtzeko, esan zion senarrari: “Gaur eguerdia baino lehen, zelaira joaten
bazara eta lurretik ateratzen banauzu, betirako egongo naiz zurekin”.
Eta halaxe egin zuen senarrak.
Galdera da: nola jakin zuen zein lore hartu behar zuen hirurak berdin-berdinak
izanik, inongo ezberdintasunik gabeak?
Gaur da eguna oraindik ez
dudala erantzuna asmatu, eta tarteka saiatzen naiz asmatzen. Eta ezin diot
emakume hari galdetu, egun doilor hartan desagertu baitzen.
(Barre algarak egiten ditu
bat-batean) Ederra izan
zen gizon batek bileran egon nahi izan zuenekoa. (Barreak berriro, gogotsu) Bazen gizon bat izugarri maite zituenak
ipuinak eta kuriositateak erraiak jaten
zizkion. Egun batean bururatu zitzaion emakumez janztea eta bileran agertu.
Emazteari edo arrebaren bati kendutako, edo auskalo nondik lortutako emakume jantziekin
kaletik barrena abiatu zen etxerantz. Aurpegia ere edertu zuen margo
koloretsuekin. Ikusi behar zen gizon haren itxura! (barreak) Titi handi batzuk jarri zituen, bata hegoaldera eta beste
iparraldera begira. Zergatik ote dute gizonek halako tema emakumeen bularrekin?
Handiak behar ditugu, emakume “benetakoa” izateko! Agian, txikitan bularra
hartzerakoan gelditu zaien irudia izango da, amaren goxoa izango dute gordea
buruko zokoren batean (ideia barregarri
bat etortzen zaio derrepente) edo beste lekuren batean (barre egiten du berriro). Neronek ez daukat sekulako bularrik eta
hargatik ez dut konplexurik. Batek baino gehiagok bularrekin baino errapeekin amestuko du seguru! Ba gizon hura
bileran agertu eta denak begiratu genion jakina, ezin baitzuen disimulatu bere
“jatorria” nahiz eta berak hala uste. Bileran zegoen zaharrenak, konturatu ez
balitz bezala mintzatu zen (Haren ahotsa imitatzen du): “Tira, badakizue astean
behin bilera hasi aurretik badugula aitzinako ohitura. Gure emakume itxura ea
behar den moduan zaintzen dugunaren froga. Hasi aurretik ikusiko dugu ea
guztiak gure beheko aldea ondo zainduta dugun”. Guztiak harrituak ginen ez
baikenuen halakorik inoiz entzun, baina serio-serio jarraitu zuen. Orduan
etorri berriari begiratu eta keinurik egin gabe esan zion: “Ea, zu hasiko zara,
lehenengo aldiz heldu baitzara. Erakutsi egiguzu zure alua”. Guk harritu aurpegia jarri bagenuen, ikusi
behar zen tipoarena! (barreak
gogoratzerakoan) Guk ezin barreari eutsi eta tipoa gorri-gorri hasi zen
jartzen, urduri, zer egin ez zekiela. Emakumea berarengana hurbildu zen eta
biluzten laguntzeko keinuak egin zituenean, ziztuan alde egin zuen gizonak,
denak barrez lehertzen hasi ginelarik. Bilera haietan gizonek debekatuta zuten
sartzea, eta han kontatzen zirenak emakumeak baino ezin zituzten entzun, hori
zen legea. Orain ordea, zer gelditzen zaigu? (Hasierako goibeltasunera itzultzen da) Ezer ez! Oroimena baino ez.
Eta hori ere debekatu nahi digute. Oroimena suntsitu. Sinestarazi lehen ez
ginela eta gure patua ezinbestekoa izan dela. Gure errua. Gure egoskorkeria.
Dagokigun lekua ez dugulako onartzen. Euren erabakitzen dute zer gogoratu
dezakegun eta zer ez. Arima lapurtu nahi digute. Izaera berri bat ezarri.
Horregatik akabatzen dituzte haurrak, etxeak, kaleak. Zuhaitzak errotik
ateratzen dituzte. Soroak gatzekin erre. Landareei haziak kendu. Gure istorioak
eta ipuinak debekatu. Itxaropenik izan ez dezagun. Gure etorkizuna euren esku
dagoela argi uzteko.
(Altxatzen da. Norbaiti zuzenduko balitz bezala. Orain bere ahotsa
indartsu entzuten da. Sendo.)
Zer egin dizugu? Zer?!
Zergatik tratatzen gaituzu zakur amorratuen gisa! Errotarrian lotuta dagoen
astoak bizitza duinagoa ematen diozu. Zapaltzen ditugun osinak baino balore
gutxiago dugu. Zerri jana ere ez omen dugu merezi. Eta zer gelditzen zaigu orduan?
Bizitzaren patua datorren bezala onartzea? Harriak bezain mutu bizitzea? Zer
gelditzen zaigu, geure burua gutxietsi errua gurea dela sinistu arte?
Horretarako gara sortuak? Ba ez duzu lortuko. Ez duzu lortuko geure mintzoa,
geure izaera, geure duintasuna lokaztea, galtzea, suntsitzea. Gelditzen zaigun
bakarra gure izatearen kontzientzia da, horrek mantentzen gaitu duintasunean.
Eta duintasun hori amorruz erakutsiko dugu, amorru duina.
Nekatuta nago, indarge.
Arima, halakorik balego, malkoetan blai daukat. Nire oinek ez dute ia urratsik
uzten lur madarikatu honetan. Nahiko nuke dena oraintxe amaituko balitz. Baina
ezin dut. Etsitzea oroimena ondoratzea litzateke, duintasuna lokaztea, etxe
atariko zapatak zaborretara botatzea. Bulebar zabaletan maitearen eskutik
paseatzearen ametsa abandonatzea. Orri zuri batean egindako koloretako
marrazkiak ahaztea. Eta datozen haurrek ez dute merezi koloretako margorik
gabeko eskolarik. Ez dute merezi gure
isiltasuna, gure doilorkeria. Itsas zabalekin amestea zor diegu, non belauntzi
akasdunek nabigatzen duten, ez portuen bila, nabigatzearen gozamenaz baizik.
Izurdeak lagun, txori kantaria masta nagusian eta lemazain irribarretsua,
ostertza begiradan. Eta beti aurrera, beti aurrera, beti aurrera haizearen
norabidean.
Amaiera
Iluna egiten da eta haur irribarretsuen argazkiak proiektatzen dira.
Mundu osoko haurrak dira, beltzak, horiak, txuriak; hirikoak, mendikoak,
basamortukoak, oihanekoak. “Etorriko dira berriz” kanta entzuten da Maddi
Oihenart-en ahotsean.
iruzkinik ez:
Argitaratu iruzkina